Endlich wieder mal was Neues von meiner Seite. Der Text wie immer zum Mitlesen: Da het mi doch chürzlech wieder so 'ne Typ verlah i ha drufabe 14 Tag e Chatzejammer gha Ha grännet u ha töipelet, i ds Bodelose gsoffe u itz cha mini Jammerchatz uf'ne schöne Kater hoffe Dr Moudi rauet ufem Dach u lah mi chuum lah pfuuse I gloube, mini Chummerchatz bruucht dringend öppis z schmuuse I ha es Zytli zuegluegt gha - u itze ha-n-i ds Gschänk... Hätt gschyder scho bizyte das Vych im Bier ertränkt! Dir ahnet ja scho, liebei Lütt, was vo der Gschicht isch blibe: Mi Kater u mi Jammerchatz hei's fröhlech zäme tribe. Geschter wirft das Eländstier - 's het ja so müesse cho - e ganzi Hand voll Chätzli. Dr Kater isch dervo. U hütt, da bringt si se ganz stolz - so luege se halt aa Di Chlyne chöi ja nüt derfür, sölle glych e Name ha. Ds erschte het es schäbigs Fälll, ligt da u seit keh Ton i gloube das isch würklech e chlyni Depression. D Krise isch rächt rabiat u laht sech chuum lah stalle u i alles, wo i d Nechi chunnt, versänkt si ihrer Chralle, spielt mitem chlynschte Brüederli ständig Chatz u Muus - doch das isch fridlech u verspilt. I säge-n-ihm dr Blues. Eis Chätzli luegt zum Fänschter us u tröimt vom nächschte Summer. Es chunnt ganz nach dr Alte u i toufe's Liebeschummer. Ds füfte wetti gschööselet u ghäbt u gstrichlet sy. Es het es wysses, sydigs Fäll u heisst Melancholie. Si sy alli ganz verschide, doch kehs schlaht us dr Art u so het jede Tag für mi e nöii Truur parat. Drumm suff nie i dis Eländ, süsch geit's dr glych wi mir. Bevor di Chummer Nachwuchs zügt, häb Sorg mer mitem Bier